नेवासा तालुक्यातील काळीज पिळवटून टाकणारी घटना

🔊 बातमी ऐका

नेवासा तालुक्यातील काळीज पिळवटून टाकणारी घटना

कालिका फर्निचरच्या गोडाऊनला भीषण आग – मालकासह पाच जणांचा दुर्दैवी मृत्यू

नेवासा तालुक्यात काल रात्री घडलेली दुर्घटना संपूर्ण परिसराला हादरवून गेली. सुप्रसिद्ध कालिका फर्निचर या गोडाऊनला अचानक रात्री उशिरा भीषण आग लागून संपूर्ण गोडाऊन जळून खाक झाले. याच आगीत गुदमरून गोडाऊनचे मालक मयुर रासने यांच्यासह त्यांचे कुटुंबीय असा एकूण पाच जणांचा मृत्यू झाल्याची हृदयद्रावक घटना घडली.

मिळालेल्या माहितीनुसार, आग लागल्याचे कळताच परिसरातील नागरिकांनी घटनास्थळी धाव घेतली, मात्र आगीचे स्वरूप एवढे भयंकर होते की मदत कार्याला अडथळे आले. फर्निचर, लाकूडसामान, कपडे, वीज तारा व इतर ज्वलनशील वस्तूंमुळे आगीने काही मिनिटांतच भीषण रूप धारण केले. धुरामुळे गुदमरून मालक मयुर रासने, त्यांची पत्नी, दोन लहान मुले व आज्जी यांचा जागीच मृत्यू झाला.

या दुर्घटनेने नेवासा तालुक्यासह संपूर्ण जिल्ह्यात शोककळा पसरली आहे. परिसरातील नागरिक व व्यापारीवर्ग हतबल झाला आहे. रासने कुटुंब हे सामाजिक कार्यात नेहमी पुढाकार घेत होते. त्यांच्या अचानक झालेल्या निधनामुळे गावातील प्रत्येक डोळा पाणावला आहे.

दरम्यान, घटनेची माहिती मिळताच अग्निशमन दल व पोलिस घटनास्थळी दाखल झाले. आगीवर नियंत्रण मिळवण्यासाठी शर्थीचे प्रयत्न सुरू केले गेले. मात्र तोपर्यंत लाखोंचे नुकसान होऊन मौल्यवान जीव हकनाक गेले.

या घटनेने गावभरच नव्हे तर संपूर्ण जिल्ह्यात हळहळ व्यक्त होत आहे. शोकाकुल वातावरणात रासने कुटुंबीयांचे अंत्यसंस्कार करण्यात आले. ही घटना ही नेवासा तालुक्यातील अलीकडच्या काळातील सर्वात भीषण व काळीज पिळवटून टाकणारी ठरली आहे.