खैरी निमगांव येथील संकेत सारंगधर झुराळे चालु मोटार सायकलवर बिबट्याने झडप मारुन त्यास जखमी केले
श्रीरामपूर तालुक्यातील खैरी निमगांव येथील संकेत सारंगधर झुराळे हा युवक दिघीचारी रोडने मोटार सायकलवरून जात असताना अचानक चालु मोटार सायकलवर बिबट्याने झडप मारुन त्यास जखमी केले.
संकेत झुराळे हा कामानिमीत्त घरून संध्याकाळी सातच्या दरम्यान राजु शिंदे यांच्याबरोबर दिघीचारी रोडने जात असताना अचानक सोपान शेजुळ यांच्या नविन विहिरीजवळील दोन कडुलिंबाच्या झाडा आडून बिबट्याने संकेतच्या मोटार सायकलवर झडप घेत त्याला जखमी केले. सुदैवाने त्याच्या मागे असणाऱ्या शिंदेच्या गाडीच्या उजेडात बिबट्या पळून गेला या सर्व गडबडीत गाडी चारीत जाता जाता राहीली लगेच शिंदे यांनी त्याला गाडी काढून चालु करायला सांगत ते घटनास्थळावरून सुरक्षीत ठिकाणी आले त्यानंतर संकेत यास श्रीरामपूरच्या साखर कामगार येथे दाखल करण्यात आले. दरम्यान उपचारासाठी आवश्यक औषधी उपलब्ध नसल्याने त्याला नगरच्या सिव्हील हॉस्पिटलमध्ये उपचारासाठी पाठविण्यात आले या दरम्यान वनाधिकाऱ्यांना याबाबत माहीती दिली असता आम्ही सिव्हीलला फोन करून सांगतो म्हणत ताबडतोब उपचारासाठी संकेतला घेऊन जाण्यास सांगीतले. दिघीचारी रोडलगतच्या या भागात गेल्या अनेक दिवसांपासुन बिबट्याचे दर्शन घडत असते मात्र गाडीवर झडप मारून जखमी करण्याची हि घटना या भागात पहिल्यांदाच घडल्याने या दिघीचारी परीसरासह ज्या ज्या ठिकाणी बिबट्याचे दर्शन होत असते त्या भागात दहशतीचे वातावरण निर्माण झाले असुन वनविभागाने त्वरीत पिंजरा लावून बिबट्याचा बंदोबस्त करण्याची मागणी वाढली आहे.
