पत्रकार महाजन यांच्यावर झालेल्या हल्ल्याचा राहुरीतील पत्रकारांकडून निषेध
पत्रकार महाजन यांच्यावर झालेल्या हल्ल्याचा राहुरीतील पत्रकारांकडून निषेध
पाचोरा (जि. जळगाव) येथील पत्रकार संदीप महाजन यांच्यावर दोन दिवसांपूर्वी झालेल्या हल्ल्याचा राहुरी तालुक्यातील सर्व पत्रकारांनी नायब तहसीलदार संध्या दळवी व पोलिस निरीक्षक धनंजय जाधव यांना निवेदन देऊन निषेध करण्यात आला.
या निवेदनात म्हटले आहे की, जळगाव जिल्ह्य़ातील पाचोरा येथील पत्रकार संदीप महाजन यांच्यावर बुधवारी भ्याड हल्ला करण्यात आला. तत्पूर्वी त्यांनी दिलेल्या एका बातमीवरून संतापलेल्या आ. किशोर पाटील यांनी अत्यंत अर्वाच्च, शिवराळ भाषेत महाजन यांना शिविगाळ केली. त्याचं रेकॉर्डिंग व्हायरल झाल्यानंतर उभा महाराष्ट्र नि:स्तब्ध झाला होता एक लोकप्रतिनिधी, आमदार एवढी शिवराळ भाषा कशी वापरू शकतो असा प्रश्न महाराष्ट्राला पडला आहे. किशोर पाटील यांनी केवळ शिव्याच दिल्या नाहीत तर महाजन यांना जीवे मारण्याची धमकी देखील दिली आहे. हे सारं संतापजनक आणि निषेधार्ह आहे. काही गुंडांनी महाजन यांच्यावर हल्ला केला. तो व्हिडीओ देखील सर्वत्र व्हायरल झाला आहे. ज्या गुंडांनी महाजन यांच्यावर हल्ला केला ते देखील नेहमी किशोर पाटील यांच्याबरोबर असतात असा संदीप महाजन यांचा आरोप आहे, आरोपींचे आणि किशोर पाटील यांचे मोबाईल संभाषण तपासले तर हा किशोर पाटील यांचाच कट असल्याचे दिसून येईल असाही संदीप महाजन यांचा आरोप आहे. आमची आपणास विनंती आहे की, महाजन यांच्यावरील हल्ल्याची सखोल चौकशी करून या मागचे जे सूत्रधार आहेत त्यांच्या विरोधात पत्रकार संरक्षण कायद्यानुसार गुन्हा दाखल करावा अशी आमची मागणी आहे.
यावेळी जेष्ठ पत्रकार रमेश बोरुडे, गणेश विघे, विनित धसाळ, रियाज देशमुख, मनोज साळवे, गोविंद फुणगे, संतोष जाधव, आकाश येवले, अशोक मंडलिक आदी पत्रकार उपस्थित होते.
