तिळापुर येथे आषाढी एकादशी निमित्त विठुरायाच्या नामघोशात परिसर दुमदुमला
तिळापुर येथे आषाढी एकादशी निमित्त विठुरायाच्या नामघोशात परिसर दुमदुमला
तिळापुर (वार्ताहर) :आषाढी एकादशीच्या पावन दिनानिमित्त तिळापुर येथील संगमेश्वर संस्थान येथे भक्तिरसात न्हालेला कार्यक्रम मोठ्या भक्तिभावाने पार पडला. यावेळी ह. भ. प. राजाराम महाराज यांच्या सुश्राव्य कीर्तनाचे आयोजन करण्यात आले होते. महाराजांनी ज्ञान, भक्ती, वैराग्य आणि संत परंपरेचे महत्त्व यावर प्रभावी विवेचन करत भाविकांना अध्यात्मिक संदेश दिला. त्यांच्या गोड वाणीतील अभंग, ओव्यांनी उपस्थित भाविकांचे मन मंत्रमुग्ध केले.
कीर्तनानंतर श्रीविठ्ठल नामस्मरणाचा जयघोष करत सामूहिक महाप्रसाद कार्यक्रम संपन्न झाला. पंचक्रोशीतील सर्व भाविक, भक्त, महिला, वृद्ध, लहान मुले मोठ्या श्रद्धेने सहभागी झाले होते. महाप्रसादामध्ये सर्वांनी भक्तिभावाने सहभाग घेतला.
या कार्यक्रमामुळे तिळापुर व परिसरात उत्साहाचे आणि भक्तीमय वातावरण निर्माण झाले होते. आयोजक मंडळ, गावकरी आणि स्वयंसेवक यांनी अतिशय चांगली व्यवस्था केल्यामुळे हा धार्मिक कार्यक्रम यशस्वीरीत्या पार पडला.
